Guardo migahin P1M alang sa Cebuano athletes

Si kanhi Cebu City Sports Commission (CCSC) chairman Jonathan Guardo migahin og usa ka milyon ka pisos nga itabang alang sa mga Sugbuanong atleta nga mosalmot sa nagkadaiyang lokal ug nasyonal nga mga kompetisyon.

Ang pundo makuha sa Guardo Sports Foundation.

Si Guardo, kinsa mibiya sa iyang katungdanan isip tsirman sa CCSC sa sayong bahin ning tuiga nisaad nga motabang sa mga Sugbuanong atleta gawas sa pag-sponsor ug pagtukod og sports activities sa nagkalain-laing kabarangayan.

"It has always been part of our company goals to reach out to the community through sports. And we will continue to do so in the coming years," matud pa ni Guardo.

Si Guardo padayong misuporta sa mga Cebuano athletes sama sa Siso siblings, John Francis, Largo, Team Cebu City-Table Tennis ug TCC Dancesport sa ilang regional ug national competitions.

Sa P1 million, P500,000 ang mapunta sa mountainbike series nga mosikad sa mosunod nga mga bulan.

Kahinumduman, ang Guardo Sports mipasiugda sa first leg sa ilang mountainbike series sa miaging bulan sa Mayo.

Ang Badminton tournaments gahinan og P100,000, ang basketball adunay P250,000 ug ang P100,000 adto magamit sa tinuig nga Osaka-Guardo Anniversary Run nga gitakda karong bulan sa Oktubre.

Gawas sa mountainbike, ang Guardo Sports mipasiugda sab og badminton ug tennis events niadtong Marso ang nagkalain-laing torneyo sa basketbol sa nagkadaiyang barangay.

Atol sa iyang pagdumala isip CCSC head, si Guardo daku'g natabang pagpadala sa TCC athletes ngadto sa Cleveland, Ohio alang sa Children's International Games niadtong tuig 2004 ug sa Arafura Games sa Australia sa miaging tuig.

Sa laing bahin, ang Guardo Sports nangandam na alang sa Osaka-Guardo Anniversary Run karong Oktubre.

Ang tinuig nga lumba nakanselar sa miaging tuig tungod sa ka-apeki sa iskedyul diin ang ilang gihatagan og pagtagad mao ang 2005 Southeast Asian Games.