Title defense gi-uswag

Ang pagdepensa sa bakus ni ALA stalwart Czar Amonsot sa World Boxing Organization (WBO) Asia Pacific super bantamweight batok sa Indonesian nga si Moises Seran gi-uswag human ang Bol-anon na-injury sa iyang tuo nga kamot atol sa ilang away batok sa Meksikanong si Silverio Ortiz sa undercard sa Pacquiao-Larios showdown niadtong Domingo didto sa Araneta Coliseum.

Si Amonsot gikatakda untang makigharong ni Seran karong Hulyo 22 didto sa Tagbilaran City, apan tungod sa maong kakulian gi-uswag ang maong away sa ikaduhang semana sa Agosto.

Nakapamati og sakit sa iyang tuong kamot si Amonsot human sa iyang kadaugan pinaagi sa unanimous decision sa ilang napulo ka hugna nga kumbati.

Matud pa ni Amonsot nga iya kining nakuha dihang ang iyang tuong kumo milandig sa ulo ni Ortiz sa ikalimang hugna.

Sumala pa ni Amonsot nga iya lang gyud nga gi-agwanta ang kasakit nga iyang gibati aron makahatag og dungog ning makasaysayanong "Thrilla in Manila II." Ang unang "Thrilla in Manila" nahitabo 31 ka tuig na ang milabay tali nilang Muhammad Ali ug Joe Frazier didto lang gihapon sa Big Dome.

Si Amonsot wala gyud mapakyas sa pagpakita sa iyang ngilngig nga impression sa boksing samtang milampos usab ang iyang mga kaubang boksidor pagpukan sa mga Meksikano.

Ang "Mano-A-Mano" Philippines batok Mexico, naghatag og maayong impression sa mga Pinoy boxers human sa ilang pagpangharos, 5-0.

"Amonsot's performance was impressive, very satisfactory," matud pang international promoter Sammy Gello-ani.

"However, Amonsot's injury will take some time to heal so I have to postpone his forthcoming title defense, maybe in the last week of August," dugang pang Gello-ani.

Si Amonsot kasamtangan karong nagbitbit og 17-1-1 win-loss-draw record uban ang 10 ka KOs.