Dili pa hanas

Usa ka magbabasa niining lindog mi-text kanako nga nagkanayon: "Gusto gyud kong makakat-on og billiard. Unsa man ang labing maayong paagi nga makakat-on ko pagdula og billiards? Dili man gud ko hanas modula og billiards. Pero mao na gyud nay akong hilig." -- 0919-2388935

* * *

Daghang salamat sa imong text. Nalipay ko pagkasayod nga mahiligon ka sab diay sa pagdula og billiard. Nakaseguro ko nga moabot ang higayon nga mahanas ka sa pagdula og billiard kun magpadayon lang ang imong kakugi sa pagbansay.

Ang labing maayong paagi sa pagkat-on sa pagdula og billiard mao ang pagbansay. Kini ang girekomendar sa mga eksperto nga angay buhaton ilabi na sa mga magtutuon. Kay ang pagbansay gud mao ang labing praktikal nga paagi sa pagkat-on sa billiard sport.

* * *

Mao man gani nga ang mga eksperto misugyot gayod nga ang magdudula kinahanglan nga magpahigayon og regular practice session. Gikinahanglan man gud sa magdudula ang kanunay nga pagbansay aron siya mahanas sa dula nga iyang gikahiligan. Ang kanunay nga pagbansay maoy sekreto sa kahanas.

Ang imong pag-angkon nga dili ka pa hanas nga modula og billiard maoy timailhan sa imong pagka-humble. Nindot kining maong hiyas tungod kay ang kasagaran sa mga tawo nga ingon niini humok tudloan ug dali nga makakat-on. Mao nga dili ka angay magtinapol sa pagbansay aron mouswag ang imong abilidad sa dula.

* * *

Isugyot ko usab kanimo ang pagbasa sa mga libro mahitungod sa billiard sport. Makatabang kini kanimo aron makabaton ka og ideya kun unsaon pagbansay sa labing epektibong paagi. Ang mga libro ug ubang basahon bahin sa billiard sport makuhaan nimo og mga tips nga sarang nimong magamit sa imong pagbansay.

Ang nindot nga libro nga akong ikarekomendar nga imong basahon mao ang "How Would You Play This" ug "A Smarter Way To Learn Pool." Kining maong mga libro pulos gisulat ni George Fels. Dili kinahanglan nga paliton nimo kining duha ka libro. Magpili lang ka kun hain niining duha ang imong magustohan.

* * *

Dunay nindot nga bilyaran nga angay hugopan sa katawhan diha sa Ormoc City. Kini mao ang Ormoc Lanes Sports Center. Kining maong dulaan nagtanyag og luho nga bilyaran nga maayo gayod kaayong dulaan sa atong mga klasmit nga bilyarista.

Busa kun anaa kamo sa Ormoc, sulayi ninyo pagduaw ang Ormoc Lanes Sports Center aron inyong mamatud-an nga tinuod kining akong gisulti.

* * *

(Text sa 0910-8105522)