SCBHABA-M. Lhuillier, CECABA All Stars nagsawo sa liderato

Midaog ang San Carlos Boys High Alumni Basketball Association (SCBHABA-M. Lhuillier) sa ilang duwa batok sa Club Monday-Gatorade sa iskor nga 96-77 sa 2006 Executives Cup basketball tournament niadtong Huwebes didto sa City Sports Club Cebu gym.

Ang SCBHABA-M. Lhuillier kasamtangan na karong nakigsawo sa Cebu Eastern College Alumni Basketball Association (CECABA) All-Stars sa liderato uban ang 5-1 win-loss record.

Si Edwin Banaag maoy nangulo sa maong kalampusan sa iyang 22 puntos gawas sa pito ka assists, lima ka steals ug upat ka rebounds.

Ang SCBHABA nabiyaan og dos puntos paghuman sa unang kuwarter, 20-22, apan ngilngig kaayo kining mipatuasik sa ilang opensa sa ikaduhang kuwarter pinaagi sa ilang 26-10 run aron pag-ilog sa labaw, 46-32 sa half time.

Giinat pa sa SCBHABA ang ilang labaw ngadto sa 21 puntos, 73-52 dayon na ngadto sa kadaugan.

Si Demosthenes Alfeche adunay 26 puntos uban ang 14 ka rebounds, samtang si Andres Seno Jr. midugang og 25 puntos ug 10 ka rebounds aron sa pagpangulo sa pilderong Club Monday nga nakatilaw sa ilang ika-upat nga kaparotan sulod sa pito ka duwa.

Sa laing bahin, ang Punta Princesa Sports Association (PPSA)-I Cooler Marketing mipukan sab sa Sacred Heart Alumni Basketball Association (SHABA)-Cebu Home Builders, 71-65.