Peñalosa nagtinguha pa mahimong world champ

Si kanhi WBC super flyweight champion Gerry Peñalosa nagkanayon nga buhaton niya kutob sa iyang mahimo nga mohimo og impresyon sa umaabot niyang away batok sa Meksikanong si Tomas Rojas gumikan kay nagtinguha pa siyang mamahimong world champion pag-usab.

Si Peñalosa gikatakda nga makigharong batok ni Rojas sa usa sa kulbahinam nga undercard sa pagdepensa ni Manny Pacquiao sa iyang WBC International super featherweight title batok sa Meksikanong si Oscar Larios karong Hulyo 2 didto sa Araneta Coliseum.

Matud pa ni Peñalosa, nagbansay-bansay siya uban ni Pacquiao sa Wild Card Gym didto sa Hollywood, California nga gipanag-iya sa inilang American trainer nga si Freddie Roach, nga kondisyon kaayo siya ug andam nang makigbinukbukay ni Rojas.

Midugang si Peñalosa nga gikinahanglan nga mokulit siya og impresibong kadaugan batok ni Rojas aron maka-angkon siya og tsansa nga hagiton ang kasamtangan WBC bantamweight champion nga si Rafael Marquez.

Sa iyang bahin, si Roach nagtuo nga si Peñalosa usa ka tang-an nga boksidor nga makapilde ni Rojas ug aduna kini paglaum nga ma-world champion pag-usab.

Si Peñalosa nagbitbit og baraha nga 49-5-2- uban ang 33KOs, samtang si Rojas nagtangag og baraha nga 22-8 ug 14 sa mga biktima niini iyang gipalukapa.