Maasin mo-host amateur boxing

Ang 21st edition sa Visayas Inter-City Amateur Boxing Developmental Championship adto duwaon sa Maasin City karong Hunyo 21-25.

Kini agi'g tubag sa hangyo ni Southern Leyte Governor Rosette Lerias, kinsa mihangyo ni event organizer Antonio L. Aldeguer nga maoy mo-host sa 21st edition.

Ang 20th edition didto gipahigayon sa Tacloban City.

Bisan pa sa mubo nga pagpahibalo, malaumon gihapon si Aldeguer nga mahapsay ang pagpadagan sa maong event uban sa Provincial Governor sa Southern Leyte nga nagpaluyo niini.

Mao kini ang ikaduhang higayon nga ang Maasin mopasiugda og kompetisyon, ang una napahigayon tulo na ka tuig ang milabay.

Ning higayona, ang Provincial Government ang mo-host didto sa Sunken Garden duol sa Capitol Building.

Walo na ka teams ang mipadayag sa ilang pagsalmot ning maong kompetisyon kini naglakip sa Cebu City Niños, Talisay City-Cebu, Mandaue, Ormoc, Bacolod, Tagbilaran, Toledo ug Maasin City.

Ang Dumaguete City gipadad-an sab og imbetasyon apan wala pa kini mokompirmar sa ilang partisipasyon.

Sa ilang bahin, ang defending champion, Tacloban mihukom nga mosalmot sa National Open inay sa Inter-City.