5th leg sa RECYCLE series himuon karon

Si Hitler Nemesis ug Team Velonauts maoy mangu sa mga partisipante sa pagsikad sa fifth leg sa RECYCLE series karong adlawa diha sa Mandaue City reclamation area.

Si Nemesis miangkon sa kinatas-ang dapit human sa Independence Day outing pinaagi lamang sa uno punto, 54-53 batok ni Jun-jun Canasa sa Team Kalit.

Si Richard Patalinghug maoy mipahiluna sa ikatulong dapit uban sa iyang 50 puntos, gisundan ni John Paul Baco sa iyang 41 alang sa ikaupat nga dapit ug Xerox Lauron nga maoy mikapyot sa ikalimang dapit uban ang 36 puntos.

Samtang si Nemesis nagpahayahay sa kinatumyang dapit sa overall position, ang iyang koponan nga Velonauts komportable nga nag-una uban ang 122 puntos.

Ang Velonauts miarangkada sa kinatas-an human midaog sa team time trial (TTT) sa miaging Lunes.

Ang Lapulapu-RUT maoy misunod alang sa ikaduhang dapit uban ang 108 puntos ug ang Team Kalit maoy ikatulo nga mipupo og 104 puntos.