Pressure sa paningkamot

Matud pa ni Analie Paglia, billiard columnist sa website sa Azbilliards.com, adunay pressure nga masinati ang usa ka bilyarista sa higayon nga maningkamot siya sa pag-step up sa iyang performance sa ibabaw sa lamesa. Nasinati kini mismo ni Paglia tungod kay usa man usab siya ka magdudula.

Tinuod kining gibutyag ni Paglia sa iyang kolumn. Ang paghunahuna pa lang nga kinahanglan gayod nga maningkamot aron mo-step up sa performance, kana magbutang na sa magdudula sa pressure situation. Unsa na kaha kun anaa na siya sa aktuwal nga pagdula diin kinahanglan na niyang buhaton ang kutob sa iyang mahimo. Seguradong mas grabe gyud tingali ang pressure.

Matud pa ni Paglia, nasayod siya nga ang pagbati sa babaye lahi kay sa lalaki. Niya pa, mahimo nga mas menos ang bation nga pressure sa lalaki kay sa babaye atol sa pagdula, apan kining maong gumonhap dili gayod malikayan sa matag magdudula.

* * *

Sa bisan unsang matang sa pakigbisog anaa ang pressure. Ang magdudula makasinati og pressure sa higayon nga nasayod na siya nga ang katawhan nga nagsunod sa iyang career taas kaayo og expectation kaniya. Makasinati usab siya og pressure kun siya magtinguha pagbuhat sa butang nga wala pa niya mabuhat sukad-masukad sa iyang career. Labaw nang makasinati siya'g pressure kun maninguha siya sa pagpausbaw sa iyang performance laabw kay sa miagi niyang pagdula. Kini ang kasagaran nga gamot sa pressure.

Apan matud pa ni Paglia, ang sekreto aron dili mapilde sa pressure mao ang paghunahuna kanunay sa angay buhaton. Maninguha sa pag-display og nindot nga performance ug isalikway ang tanang kabalaka mahitungod sa kapakyasan. Kini ang giangkon ni Paglia nga iyang sekreto sa panahon nga siya mosalmot og torneyo ug mahimutang siya sa pressure situation.

* * *

Ang panahom ni Paglia mahitungod niining maong dula gibase lang sa iyang kasinatian isip babayeng bilyarista. Apan kini ika-apply usab nato ngadto sa career sa mga lalaking magdudula. Sa tinuod lang, lalaki man o babaye, usa ra ang ilang gikinahanglan aron motunhay sa disiplina nga ilang gikahiligan: hustong pag-atiman sa kaugalingon.

Ang paningkamot nga dili magapos sa pressure usa ka paningakmot nga nagpakita nga ang magdudula may pag-atiman sa iyang kaugalingon. Aduna ka ba niining maong mentalidad, Bords? Sukta kuno ang imong kaugalingon.

* * *

(Text sa 0910-8105522)