Sambag mipasilong na semis sa Guardo Cup

Mipasilong na ngadto sa sa semifinal round ang Sambag sa dihang ilang gilubong ang Maria Gochan, 103-78 sa nagpadayong aksiyon sa Inter-Village divisoin sa Punta Princesa Sports Association (PPSA)-Guardo Summer Cup diha sa Vicente Sotto Memorial Gym sa barangay Punta Princesa, ning siyudad.

Gidominar sa Sambag gikan sa pagsugod hangtod sa pagkahuman sa duwa gani ila pa kini nga gilubong og 27 puntos, 76-49 pagsugod sa katapusang kuwarter.

Sila si Warren Lyne ug Noel Sanico nagkumboya og 43 puntos alang sa Sambag nga mitampos sa ilang kampanya sa elimination round bitbit ang 4-2 win-loss record.

Sila si Jek Cortes ug Garnet Granada miamot og 14 puntos matag usa alang sa Sambag, samtang si Celso Desucatan midugang og 11 alang sa maong kadaugan.

Si Robin Yap Jr. maoy nangulo sa Maria Gochan nga miposte sa iyang game-high 30 puntos.

Sa laing duwa, ang Tres de Bantayan miinat sa ilang baraha, 3-2 human gipukan ang Vanz Auto Square, 85-79.

Ang nahipos nga 26 puntos ni Michael Simbajon igo na kaayo sa pagpadaog sa Tres de Bantayan. Nagkumboya og 21 puntos sila si Rex Gilbuela ug Rey Gonzales alang sa maong kalampusan.

Samtang si Junrey Gimarangan maoy nangulo sa pilderong Vanz Auto Square sa iyang 20 puntos.

Midaog sab ang Smart Tires pinaagi sa paglubong sa RCAF, 90-75.