Pipeline milubong sa Cokaliong, 110-74

Ang Pipeline Resto Bar nga gi-agak usab sa AMBL Enterprise ni Allan Lim, milubong sa Cokaliong Shipping Lines, 110-74 sa 30-above divison sa Punta Princesa Sports Association (PPSA)-Guardo Summer Cup diha sa Vicente Sotto Memorial Gym sa barangay Punta Princesa ning siyudad.

Ang Pipeline miabante og pipila lang ka puntos pagsugod sa duwa, apan kalit lang kining mihaguros sa ikaduhang kuwarter ug mipahamtang og 25 puntos nga bentaha, 84-59 nga maoy nakatidlom sa Cokaliong Shipping sa sayong bahin sa katapusang kuwarter.

Unom ka mga magduduwa nga gipangulohan ni Emy Daclan kinsa miposte og 22 puntos uban na niini ang lima ka 3-pointers, ang nakakuha og double figures. Si Jimbo Noel miani og 22 puntos, gisundan ni Robert Abasolo sa iyang 16 puntos, samtang sila si Chito Hernandez, Lito Navarro ug Mante nagkumboya og 35 puntos.

Ang kanhi CIT Wildcat Andy Fuentes ug Edgar Solon nga mipupo og 15 matag usa maoy nangulo sa pilderong Cokaliong.

Sa laing bahin, ang RCAF milubong sab sa walay daog-daog nga Litvergs, 100-76 luyo sa paningkamot nilang Dandre Baclay ug Fred del Campo nga nagkumboya og 36 puntos. Samtang si Romeo Faunillan mitampo og 10 puntos alang sa RCAF.

Sila si Jun Garzo ug Alvin Paez nga mihipos og 16 puntos matag usa maoy nangulo sa pilderong Litvergs.

Sa Inter-Village category, ang Chikakoy mipabuto sab og makabungog nga opensa aron paglubong sa SJB, 73-55.

Si Makoy Villagonzalo nga adunay 29 puntos maoy nangulo sa Chikakoy, samtang si Brunson Abatayo nga adunay 20 puntos mao usab ang nangulo sa pilderong SJB.