PacMan-GenSan kampiyon na sa MVBA Mindanao Division

Ang pagpanginit sa PacMan-GenSan sa nanghinapos nga bahin sa duwa maoy nakapukan sa Iligan Archangels, 81-73 sa Game-2 sa ilang best-of-three finals aron pag-angkon sa labing unang Mindanao Division title sa ML Kwarta Padala Mindanao Visayas Basketball Association (MVBA) First Conference niadtong Biyernes didto sa General Santos City Gym.

Ang PacMan ni boxing superstar Manny Pacquiao ug Ramon Pido nagsandig sa lima ka 3-point shots nilang Weng Farochillen, Apol Coronado ug Donald Tadena aron pagposte og 26-17 nga labaw human sa unang kuwarter.

Ang Pacman miposte sa kinadak-an nilang labaw nga 12 puntos sa iskor nga 31-19 human nasud ang itsa ni Mindanao Division MVP Louie Medalla sa ikaduhang kuwarter.

Ang Iligan nikitkit sa iskor, 63-65 human nasud ang 3-point shot ni Michael Bangloy sa nahibilin nga 9:40 sa duwa, apan mao ra kadto ang labing nindot nilang nahimo gumikan kay mi-arangkada og balik ang PacMan aron pagpabalik sa ilang 79-69 nga labaw sa nahabilin nga 50 segundos sa duwa.

Nangulo sa Pacman mao si Medalla, kinsa mitali og 17 puntos. Sila si Farochillen ug Coronado miamot og 13 puntos matag usa, samtang si Jaypee Locsin midugang og 11 alang sa PacMan nga makigharong batok sa modaog sa serye tali sa M. Lhuillier Kwarta Padala Jewelers ug Cebu Landmasters-Toledo alang sa labing unang kampiyonato sa MVBA.

Ang best-of-three series tali sa M. Lhuillier ug Toledo Landmasters sugdan karong Miyerkules diha sa Cebu Coliseum.