Ang binakbakay nilang Gorres ug Miranda usa sa mga supporting bouts sa double World Boxing Organization championship diin sila si Fernando Montiel ug Daniel Ponce de Leon makigsinukliay og kumo batok sa managlahing kaatbang.
Si Montiel modepensa sa iyang korona isip WBO bantamweight champion batok ni Jhonny Gonzalez, samtang si Ponce de Leon makigharong ni Alejandro Barrera alang sa WBO junior featherweight title.
Kun modaog si Gorres, mosamot kahayag ang iyang kahigayonan nga mo-away og world title sud ning tuiga ilabi na kun modaog si Montiel batok ni Gonzalez ug sakmiton niini ang WBO bantamweight title.
Awtomatik nga biyaan ni Montiel ang iyang trono isip WBO super flyweight champion ug hayan nga ang top WBO jr bantamweight contenders nga sila si Gorres ug Martin Powers sa Australia ang makaangkon og katungod nga mag-ilog sa bakanteng titulo sud sa 90 ka adlaw.
Ang WBO ranked No. 1 115-pounder nga si Gorres nagbitbit og 23-1-1 win-loss-draw record uban ang 12KOs, samtang si Miranda, usa ka 31-anyos gikan sa Cartagen, Bolivar, Colombia, nagtangag og baraha nga 30-10-2 diin 23 sa iyang mga biktima gipalukapa.
Sila si Gorres ug Miranda nakabagat og managlahing kasinatian sa miagi nilang away. Si Gorres mipukan ni Waenpetch Chuwatana sa Thailand aron paglangkat sa OPBF super flyweight title niadtong Marso 18 diha sa Mandaue City Cultural and Sports Complex, samtang si Miranda napilde pinaagi sa decision ni Mauricio Pastrana sa miaging bulan didto sa Florida.
Kun timbangon ang ilang rekord, ang 22-anyos nga si Gorres maoy inilog gumikan kay nakatali kini og 11 ka daog human makatilaw sa una niyang pilde pinaagi sa ninth round KO ngadto ni Edgar Rodrigo niadtong Hunyo 1, 2003 didto sa dakbayan sa Makati, samtang si Miranda napilde kaupat sa katapusan niyang lima ka away.