Team Cebu City migilak sa Bacolod

Migilak na usab ang Team Cebu City (TCC) human kini nagmangtas sa gipahigayong Visayas-Mindanao Taekwondo Championships didto sa Bacolod City.

Ang Team Cebu City misakmit og upat ka gold, duha ka silver ug unom ka bronze medals.

Si Michael Realista maoy nangulo sa Team Cebu City dihang iyang gisakiyo ang senior men's division title, samtang si Daryl Yap misakmit sa gold medal sa elementary boys' class.

Gidominar usab sa TCC ang junior division ubos sa pagpangulo nilang Richard Caingles sa mens division ug Cathy Bas alang sa womens division.

Sa laing bahin, sila si Marycris Candia ug John Bas misakmit og silver medals matag-usa sa junior division.

Midunol og bronze sa Team Cebu City mao sila si Kalyka "Kali" Carcel, Lyka Ynez, Waynedale Sagayno, Mariz Balbona, Raymond Gapas ug Steven Tan.