Bautista mobanat

Ang bitoon sa ALA Stable nga si Rey 'Boom Boom' Bautista nagtinguha nga mopadayon sa impresibo niyang pagratsada didto sa Amerika gumikan kay ang garbo sa Candijay, Bohol makigbinakbakay na batok ni Nicaraguan Roberto 'El Chucky' Bonilla sa usa ka non-title fight karong adlawa didto sa Staples Center sa Los Angeles, California.

Ang kumbati nilang Bautista ug Bonilla usa sa mga supporting bouts sa main event sa away ni Marco Antonio Barrera kinsa manalipod sa iyang WBC super featherweight title batok ni Rocky Juarez.

Si Bautista, ang WBO Asia Pacific bantamweight champion, mohimo sa ikaupat niyang away sa Amerika - ikaduha didto sa Staples Center.

Sa una niyang pagladlad sa iyang abilidad didto sa homecourt sa LA Lakers, si Bautista mipakamang sa Meksikanong si Felix Flores Murillo sud lamang sa tulo ka hugna.

Mao sab kini ang labing unang away ni Bautista ubos sa Golden Boy Promotions, nga maoy iyang promotional outfit sa Amerika.

Sa miagi niyang away niadtong bulan sa Disyembre sa miaging tuig didto sa Sycuan Resort and Casino sa California, si Bautista midaog sab pinaagi sa unanimous decision batok sa Meksikanong si Gerardo Espinoza.

Ang 19-anyos nga si Bautista nagbitbit og 19-0 win-loss record uban ang 14KOs, samtang ang 31-anyos nga si Bonilla nagtangag og baraha nga 22-7 uban ang 13KOs.