11th Gullas Tennis Cup banatan na diha sa Cebu Country Club

Daku, mahagiton ug kulbahinam nga kumbati ang mo-ulbo sa pagsugod sa 11th Gullas Tennis Cup karong alas-8:00 sa buntag diha sa Cebu Country Club tennis courts sa barangay Banilad, ning siyudad.

Dul-an sa 200 racquet-wielders, kasagaran niini gikan sa Visayas ug Mindanao ang mag-ilog sa dakung dungog ning lima ka adlaw nga torneyo nga gipaluyohan sa banay'ng Gullas pinaagi ni University of the Visayas executive vice president Jose 'Dodong' Gullas.

Mga kategoriya nga banatan mao ang 10-under unisex, boys and girls 12, 14, 16 ug 18-under.

"Like in the past years, it's going to be a very tough and exciting competition because all the top players in Vis-Min region are coming over to show their stuff and compete against Cebu's best," matud pa ni tournament director Fritz Tabura.

"The out-of-towners are among the best in their respective places and for sure, they're all in top shape because they won't gamble in coming over here only to be booted out in the first round," dugang pa ni Tabura.

Mga hinagpatan sa Sugbo ang moharong sa mga bisitang netters gikan sa lagyong dapit sama sa Tandag, Surigao del Sur, Iligan, Davao, Cagayan de Oro. Misamis Oriental, Bukidnon, Dipolog ug Tangub City.

Ang ubang mga competitors gikan sa Manila, Bacolod, Dumaguete City, Negros Oriental, Tagbilaran City ug Maasin Southern Leyte.

Ang mga garbo sa Sugbu, ang managsuong Siso nga si Sally Mae ug Bernardine 'Niño', John Francis Largo, James Karl Cañete, Jacob Lagman, Jun Querubin, Larry Antigua ug Ryan Repunte.

Si Largo sakop sa RP boys team alang sa Junior Davis Cup nga gitakda karong Mayo 1-7 didto sa Sarawak, Indonesia.

Ang tanang partisipante makadawat og libreng t-shirt. Gawas sa mga tropeyo ug gift certificates, ang mga mananaog makaangkon og puntos nga gikinahanglan alang sa ilang individual rankings.