Nganong magician man?

Kining atong ulohan karon maoy pangutana sa usa ka batan-ong magdudula nga akong gikahinabi usa ka higayon niana. Niya pa, wala siya'y ideya kun nganong gitawag si Efren 'Bata' Reyes og The Magician. Nakasabot hinuon ko kun nganong wala siya makatugkad sa gibansag ni Reyes nga The Magician. Batan-on pa siya, gani mao pay pagsugod-sugod niya'g bakyaw sa iyang tako.

Tingali ang pangutana sa maong batan-on gikasukot usab sa ubang indibidwal nga wala makatugkad kun nganong gibansagan man si Reyes og The Magician. Mao nga nadasig ko sa pagtuki niini karon alang sa benepisyo niadtong wala pa masayod mahitungod niini.

* * *

Si Reyes usa sa labing mait-on ug malalangon nga bilyarista, dili lang sa Pilipinas kondili sa tibuok na tingali nga kalibotan. Ang iyang abilidad giila sa mga respetadong billiard aficionados ug billiard enthusiasts sa kalibotan. Daghan ang nakadayeg sa talagsaon niyang estilo sa dinulaan.

Gitawag siya'g 'Magician' gumikan sa talagsaon niyang abilidad pag-spin sa bola sa ibabaw sa lamesa. Dili sabton nga may hurim-hurim siya sa mahika kalabot niini. Iya gayod kining kait-on sa pag-spin sa bola nga dili makopya sa uban. Ang brilliance sa iyang dinulaan wala sa uban ug kini nahimo niyang identity isip usa ka bilyarista.

* * *

Namatikdan kining "mahika" ni Reyes sa pagtira sa komplikado kaayong sitwasyon sa ibabaw sa billiard table. Kana bitaw'ng plastada sa mga bola nga kun atong tan-awon ingon sa walay opening. O kun duna man, daghan kaayo ang posibleng makababag sa panaw sa bola ngadto sa pocket.

Pero kapangitaan kini'g paagi ni Reyes pinaagi sa iyang mahika. Mora ba'g dunay remote control ang iyang tako nga maoy mogiya sa panaw sa bola aron makatultol kini ngadto sa pocket bisan sa daghang mga babag.

* * *

Kahinumdom mo niadtong panahon nga si Reyes maoy endorser sa produktong San Miguel Beer? Gipakita niya ang iyang 'magic" niadto? Sa pagtira niya sa bola, naporma og "S" ang pagdagan o pagligid niini diha sa lamesa. Kana tinuod gayod nga mahimo ni Reyes. Makahimo pa gani siya'g labaw pa niadto. Kay lagi, Magician man siya. Daghang mga butang iyang mahimo nga dili mabuhat sa uban.

Mao kana ang hinungdan nga dili gayod mokompiyansa ang iyang mga kaatbang. Nasayod na man gud sila sa kalibre ni Reyes pagsulbad sa labing komplikadong sitwasyon. Kay si Reyes makahimo'g opening sa mga plastada sa bola nga gituohan sa uban nga wala nay lutsanan. Ingon niini kamalalangon si Bata.

* * *

BILLIARD TIP: "Find and use a positive thought every time you set up to shoot a shot and you will stop those negatives from creeping into your game." Source: Pool and Billiard Magazine.

(Text at 0910-8105522)