Men's championship

Adunay umaabot nga torneyo nga pagasalmotan sa mga paborito natong bilyarista. Kini ang World 9-Ball Men's Championship nga pagasalmotan dili lang sa mga beteranong bilyarista sa Pilipinas kondili lakip na usab sa mga bilyarista sa ubang kanasoran.

Pulos nag-unang bilyarista sa lain-laing mga nasud ang mag-una sa pagsalmot sa maong torneyo. Gipaabot nga maoy bida ang reigning 16-year-old nga world champion nga si Wu Chia Ching sa Taiwan.

Si Ching maoy giisip nga mahimong higpit nga karibal sa titulo sa atong mga sikat nga local aces sama nila ni Efren 'Bata' Reyes, Francisco 'Django' Bustamante, Alex 'The Lion' Pagulayan ug daghan pang uban.

* * *

Ang World 9-Ball ipahigayon gumikan sa panlimbasog sa Matchroom sport ug sa ESPN Star Sports uban ang ilang local counterparts dinhi sa atong nasud. Usa kini sa labing dakung torneyo nga mahitabo niining tuiga.

Gipaabot nga moapil usab sa maong torneyo ang mga Pinoy fast-rising cuemasters nga sila si Dennis 'Surigao' Orcullo, Marlon Manalo ug daghan pang uban. Posible usab nga mosalmot sila si Lee Van Corteza, Gande Valle, Warren Kiamco, Antonio Lining ug mga kauban.

* * *

Gawas niini, gituohan usab nga mosalga sa nahisgutang torneyo ang nabantog nga mga international 9-ball stars sama nila ni Mika Immonen, Ralf Souquet, Johnny Archer, Earl Strickland, Steve Davis ug daghan pang uban.

Tungod niini, gipaabot nga usa ka malisod nga pagsulay ang atubangon sa atong local players sa ilang pag-apil sa World 9-Ball tungod kay mosalmot man lagi usab niini ang dekalibreng mga bilyarista sa kalibotan.

Mideklarar hinuon ang mga local players sa ilang kaandam pagpakigharong ni bisan kinsang magdudula. Pero nasayod usab sila nga dili gayod sila angay mokompiyansa tungod kay nahibalo na sila sa kalibre sa mga magdudula nga ilang ikasangka ibabaw sa billiard table.

* * *

Ang gipaabot sa kadaghanan nga maoy mowadwad og maayo sa maong torneyo mao sila si Reyes, Bustamante, Pagulayan ug Orcullo. Pero naglaum usab ang maong mga bilyarista nga makakuha sila'g maayong suporta gikan sa ilang mga kauban nga Pinoy cue artist.

Alang nila, okey lang kun kinsay makakuha sa titulo basta usa lang kini ka Pilipino. Mao kini ang ilang paningkamotan.

* * *

(Text sa 0910-8105522)