Garfield nanghawod sa elimination round

Ang Garfield Black miposte sa ilang ikaupat nga sunod-sunod nga kadaugan human gipukan ang LDC Warriors sa iskor nga 87-77, aron pagpanghawod sa elimination round sa First Conference Basketball League sa Cebu Athletics Basketball Association (CABA) diha sa San Nicolas Sports Complex.

Ang LDC Warriors maoy nag-una sa nag-unang duha ka kuwarter ug gani milabaw kini og 14 puntos, 47-33 sa first half luyo sa paningkamot nilang Baxter Incorporado, Oliver Navarro ug Mark Villacorta.

Padayon ang ilang pagpangatake aron pag-inat sa ilang labaw ngadto na sa 17 puntos, 71-54 paghuman sa ikatulong kuwarter.

Apan ang Garfield nanginit sa katapusang kuwarter hangtod nga nagsinukliay kini sa ilang mga puntos hangtod nga nagtabla kini sa unang higayon sa iskor, 74-74 human nasulod ang perimeter short jumper ni Ting Enicuela.

Nakatilaw sa ilang unang labaw ang Garfield human sa fastbreak ni kanhi-inter-commercial standout Reggie Licanda.

Gikan niadto gidominar sa Garfield ang maong duwa ngadto sa pag-angkon sa kadaugan.

Sila si Danny Estrera ug Licanda nagkumboya og 39 puntos aron pagpangulo sa Garfield. Nihatag sab sa ilang suporta si Roger Salili, kinsa miamot og 12 puntos, samtang si Junnie Cambonga mitunol og 11 puntos.

Sa laing duwa, ang undermanned FERI McMill milubong sa I-Cooler Marketing sa iskor nga 90-74. Si Dennis Santillan mipuga og 30 puntos aron pagpangulo sa FERI McMill, samtang sila si Cary Sanchez ug Lito Dico mao usab ang nangulo sa pilderong I-Cooler nga adunay 17 puntos matag usa.