Dy yuko sa Russian netter

Ginamit ng third seed na si Maya Gaverova ng Russia ang kanyang matikas na forehand upang talunin ang fifth seed Fil-American na si Denise Dy, 7-5, 6-2 kahapon at makarating sa girls’ singles semifinals ng 17th Mitsubishi Lancer International Juniors Championships sa Rizal Memorial Tennis Center.

Sinikap ni Dy na lumaban sa Moscow-based na si Gaverova, subalit hindi siya umubra.

"I didn’t get to play my usual game, I had a lot of errors," ani ng 17-anyos na si Dy, kasama ang Indian na si Sandhya Nagaraj ay nakatakdang lumahok sa doubles semifinals kinahapunan na laro.

Susunod na makakasagupa ng world’s No. 57 na si Gaverova, singles champion sa Thailand Open at Movenpick Juniors sa Egypt noong nakaraang taon ang second seed at world’s No. 34 na si Krystyna Antoniychuk ng Ukraine.

Naligtasan naman ni Antoniychuk, champion sa Bangkok noong nakaraang taon at finalist sa Malaysia may dalawang linggo na ang nakakaraan ang No. 11 seed American na si Veronica Li, 3-6, 6-4, 6-3.

 Sa boys division, pinatalsik ng qualifier na si Bai Yan ng China ang top seed na si Sanam Singh ng India, 7-5, 6-1.

Gumamit rin ang 17-gulang na si Bai, mula sa Nanjing ng kanyang powerful forehand para gapiin ang world’s No. 5 Indian sa isang oras at 27 minutong labanan.

"I think I played good today. I tried to be consistent with my shots," wika ni Bai, na nakarating sa quarterfinals ng Guanzhou Men’s Futures may tatlong linggo na ang nakakaraan.