National Open Invitational Athletics c'ships gitakda Mayo 4-7

Ang Philippine Amateur Track and Field Association (PATAFA) nag-awhag sa ilang local counterpart sa pagsalmot sa prestihiyosong 2006 National Open-Invitational Athletics Championship nga gitakda karong Mayo 4-7 didto sa Rizal Memorial Track and Field Oval.

Ang Cebu Track and Field Association (CETAFA) sa laing bahin, mopadala og 15-man delegation kun makakuha kini og igong pundo nga igasto alang sa partisipasyon sa Cebu athletics.

Ang mga coaches ubos sa CETAFA nipahigayon na og proseso sa pagpili og mga atleta, kinsa mopakita og aksiyon sa National Open ug ang paghagpat sa atleta gibase sa "meet standards" nga gipadala sa PATAFA.

Si Philippine Sports Commission (PSC) regional director Danilo Villadolid, ang giilang godfather sa track and field dinhi sa Sugbu, naglaraw nga mopahigayon og solicitation drive aron matabangan ang potensiyal nga mga atleta nga makaduwa sa nasudnon nga kompetisyon.

Gilauman sa PATAFA nga kapin sa 3,000 ka partisipante ang mosalmot sa National Open kini nunot sa pagpahigayon sa World Athletics Day karong Mayo 6-7.