Mga banggiitan sa ESP mag-abot sa Kanagahan, San Remigio sa Abril 15

Walay bugto ug kinutoban ang panagdumot sa duha ka banggiiitang magduduwa sa Eskrima Sukmag-Patid nga sila si Adonis Espera ug Randy Monsalud diin mag-abot na usab kini karong Abril 15 didto sa Kanagahan sa lungsod sa San Remigio, Cebu.

Si Espera sa Arcon-Arnis Full Contact Club sa Banilad, dakbayan sa Mandaue ug si Monsalud, ang pambato sa Pasil Cebu City Arnis Club magsangka sud sa lima ka hugna.

Ang modaog sa ilang engkuwentro makadawat og ganti gikan ni San Remigio Mayor Mariano Martinez.

Ang mga mananaog usab sa supporting main event makadawat og premyo gikan ni San Remigio Vice Mayor Pablito Olivar.

Samtang sa preliminary bouts, ang mga mananaog makadawat og premyo gikan sa mga konsehales sa maong lungsod, inabagan sa barangay kapitan sa kabarangayan sa maong lungsod nga gipangulohan ni barangay captain Rodrigo 'Rudy' Cambal, kinsa maoy nagpasiugda sa maong kalihukan.

Lain pang nagpaluyo sa maong kompetisyon mao ang Cosmpolitan Funeral Homes, LBC, Bogo Mayor Tining Martinez, SEEC Computer and Parts and Office Supplies sa Bogo ug konsehal Sonny Oliamot, nga sakop kanhi ug fighter sa Tigers Hall of Martial Arts sa dakbayan sa Sugbo nga gidumala ni Master Dann Diaz.