JVC registration deadline gitakda karong Marso 30

Kutob lamang sa Marso 30 ang gihatag nga adlaw ngadto sa Sugbuanong badminton players aron makaparehistro kini alang sa 2006 Badminton Regional Circuit nga pagahimuon karong Abril 3-7 diha sa Holiday Spa Center sa Banilad.

Ang event naglatid og nagkadaiyang mga kategoriya nga naglakip sa elite, juniors ug ang inter-collegiate men and women's team competition.

Ang elite ug junior divisions magtige sa singles, doubles ug mixed doubles, samtang ang collegiate entries moduwa kini sama sa elite ug junior divisions apan wala i-apil ang mixed doubles.

Ang registration sa singles entry event nagkantidad og P100 ug P150 alang sa duha ngadto sa tulo ka events. Ang registration forms makuha sa Holiday Spa o mahimong mo-download sa www.jvcbadminton.com.

Ang mga magdudula kinahanglan nga magdala og kopya sa ilang birth certificates.

Alang sa mga magdudula sa junior division, kinahanglan nga natawo kini sa o human sa Enero 1, 1990.

Mga foreign nationals mahimo usab nga makasalmot kini kon nakapuyo kini sa Pilipinas sa dili momenos usa ka tuig.

Ang mga partisipante kinahanglan nga motunga atol sa tournament meeting nga gitakda sa Abril 3 sa alas-9 sa buntag diha sa competition venue.

Alang sa dugang detalye, mahimong motawag sa 0917-8050601 (Carol), 0917-8050702 (Tonette), o dili ba sa 0917-5288970 (Nelson) or e-mail sa [email protected].

Ang makampiyon sa elite division maoy morepresentar sa Sugbu sa JVC Open karong Hunyo, samtang ang top squads sa inter-collegiate action mo-abante sa final battle sa JVC Interscholastic Championship unya sa Nobiyembre.

Ang JVC regional battle gi-isponsoran sa JVC uban ni Victor, pinaagi sa Pcome Industrial Sales, Lactacyd ug Bingo Bonanza ug gipaluyohan usab sa The STAR, Pinoy Exchange, Pioneer Life, Sunbolt, Alaska, Handford, Cebu Holiday Spa, Pohang Badminton Center, Wheel N'More Badminton Courts ug Excel Badminton Center.