Gorres, Chuwatana mag-abot karon

Sa dili pa magbinukbukay ibabaw sa ring ang mga bokisdor nga mopakita sa ilang abilidad sa "A Dream Come True" boxing promotion, mag-abot una kini sa usa ka pre-fight news conference karong alas 12:00 sa udto diha sa Baseline Restaurant.

Masentro sa atensiyon sa maong kalihukan nga gipaluyohan sa Penrex mao ang usa sa tang-an ug garbo sa ALA Stable nga si Z 'The Dream' Gorres ug ang Thai niining kaatbang nga si Waengpetch Chuwatana.

Si Gorres ug Chuwatana magpinaksitay sud sa 12 ka hugna alang sa bakanteng OPBF super flyweight title sa main event sa maong promosyon karong Sabado diha sa Mandaue City Sports and Cultural Complex.

Sa supporting main event, ang stablemate ni Gorres nga si WBO Asia Pacific super featherweight champion Czar Amonsot makigsinukliay sab sa laing Thai boxer nga si Decho Bankluaygym.

Sila si Gorres ug Amonsot parehong impresibo ang abilidad nga giladlad sa gihimo nilang pagkulata sa mga Meksikano nilang karibal niadtong Pebrero 4 didto sa Orleans Hotel and Casino sa Las Vegas.

Ang Mandauehanong si Gorres mimakmak ni Jose Alfredo Tirado sud sa 10 ka hugna, samtang ang garbo sa dakbayan sa Tagbilaran nga si Amonsot mikulata ni Christian Favela.

Lain pang mga alas sa ALA Stable nga mopakita sa ilang abilidad sa maong kulbahinam nga engkuwentro nga gipasiugdahan ni international promoter Sammy Gello-ani mao sila si Rocky Fuentes, AJ Banal, Robert Allanic ug Rey Caitom.

Si Fuentes makigsangka batok ni Jojo Bardon sa Rex 'Wakee' Salud Stable sa 12 ka hugna nga kumbati alang sa Philippine flyweight championship, samtang si Banal makigharong batok sa usa ka langyaw'ng boksidor nga si Dechapol Bankluaygym sa Bangkok, Thailand.

Sa iyang bahin, si Allanic makighamag ni Jun Pader sa Butuan City-based Bernard Yu Stable, samtang si Caitom gipaabot nga magsagubang og malisud nga tahas sa mga kamot ni Robert Rubillar sa Elorde Stable nga tua magbase sa kaulohan.

Lain pang mobanat sa maong boxing card mao ang Hapon nga si Nori Iwatani batok John Carlos, Franklin Albia batok Bryn Terez, Nic Banal batok Rolly Baclayo ug Niñolito Jalnaiz batok Noel Acasio.