Calzaghe wala pa katilaw'g pildi

Si Joe Calzaghe subli na usab nga mipakita sa iyang kapintas og kabangis human siya milampos sa pagdepensa sa iyang korona batok ni Jeff Lacy kagahapon didto sa Manchester sa England.

Sa maong kalampusan, si Calzaghe miinat sa iyang rekord ngadto sa makalilisang nga 41 ka daog og walay pildi.

Si Calzaghe, 33 anyos, misakmit sa bakus sa International Boxing Federation (IBF) ug malampuson niyang nadepensahan ang iyang titulo sa World Boxing Organisation (WBO) sa 18 ka sunod-sunod nga higayon.

Matud pa ni Calzaghe nga hapit na gyud matuman ang iyang gipangandoy nga iyang makuha ang "two-weight world champion" nga dugay na niyang gidamgo.

Ug aron matuman ang tanan, laraw karon niya nga iyang sangkaon sa bisan kinsa kanila ni world's number one light-heavyweight champion nga si Antonio Tarver o kaha ni kanhi multi-weight champion nga si Roy Jones Jr.

"Tarver is the main man at light-heavyweight but Roy Jones is more of a legend and that's a bigger fight," matud pang Calzaghe nga mipakamang ni Lacy sa katapusang hugna sa ilang away atubangan sa 15,000 ka mga fans didto sa Manchester Evening News Arena.

Si Lacy, 28 anyos, maoy paboritong modaog sa kadaghanan sa wala pa itakda ang away, apan ang kumbati na gyud ibabaw sa ring ang modesirar kung kinsa ang pinakangilngig nga super-middleweight.

Si Calzaghe midominar sa tibuok away og iyang nakuha ang pabor sa tulo ka hurado sa iskor nga 119-105, 119-107 og 119-107.

"I've never been so focused and dedicated for a fight as that," batbat pang Calzaghe nga miinat sa iyang rekord ngadto sa 41 ka daog.

"After eight years of being champion and being written off by a lot of people this fight has been on my mind constantly for the last three months.

"But it wasn't just beating him (Lacy) as I did, it was demoralising and outclassing him. I showed the world.