Mavs milampaso sa Raptors

Ang Dallas Mavericks nakabangon gikang gi-alkansi og 24 puntos sa second ngadto na sa pagsakmit sa kalampusan batok sa Toronto Raptors sa iskor nga 115-113 pinaagi sa overtime kagahapon sa National Basketball Association.

Mihatud sa kadaogan sa Mavericks mao si Dirk Nowitzki kinsa mipabuto og 32 puntos aron pagtabang sa koponan pag-inat sa ilang "club-record home winning streak" ngadto sa 14 ka sunod-sunod nga daog.

Si Nowitzki nakakuha usab og maayong suporta nilang Jason Terry ug Jerry Stackhouse kinsa usab parehong mikulekta og double figures. Si Terry milansang og 27 puntos samtang si Stackhouse midugang og 22 gawas sa walo ka assists.

Si Chris Bosh adunay 29 puntos uban ang 13 ka rebounds samtang si Mike James midugang og 25 puntos ug pito ka assists aron sa pagpangulo sa Raptors nga nakatagamtam sa ilang ikatulong sunod-sunod nga kaparutan.

Ang Mavericks milabaw, 109-105 sa overtime human si Terry ug Nowitzki mihimo og puntos, apan ang Toronto impresibong mitali og sunod-sunod nga 5 puntos uban na niini ang 15-footer ni James sa nahabiling 2:18.

Sa paningkamot sa Dallas, ila gihapong nakuha ang labaw, 113-110 sa nahabiling 51.5 sa duwa pinaagi sa back-to-back baskets ni Nowitzki. Ang Raptors nakatabla pa gyud sa duwa dihang napasulod ni Matt Bonner ang iyang 3-pointer sa nahabiling 12.4 sa overtime, apan si Nowitzki wala makatugot nga masayang ang ilang paningkamot og mipasulod kini sa iyang 18-footer jumpshot aron sa pagselyado sa kalampusan.