UV GREEN LANCERS 3-0 NA: Apan manghud niining Baby Lancers natagak sa secondary division

Ang University of the Visayas mibulhot sa ikatulo nilang sunod-sunod nga daog apan sukwahi sa miagi nilang duha ka duwa diin ilang gilabhan ang ilang kontrata, nag-agi usa og malisud nga dalan ang Green Lancers sa wala pa ligsi ang Manuel Luis Quezon University, 73-64, sa PBFI National Students Basketball Championship kagahapon didto sa Rizal Memorial Coliseum sa kaulohan.

Hinoon way suwerti ang manghud nilang UV Baby Lancers sa secondary division gumikan kay hingpit na kining nag-impake aron mopauli og balik dinhi sa Sugbu human gipalagpot sa San Beda Red Cubs, 66-75. Ang Baby Lancers ni coach Delfin "Jun" Pepito, nga gipukan sa San Sebastian College sa una nilang duwa, nakatilaw sa labing sayo nilang pagkatagak sa ubay-ubay nang national tournaments nga ilang gisalmotan. Sa collegiate division, hapsay ang paglawig sa mga batos ni coach Elmer "Boy" Cabahug ngadto sa isla sa kampiyonato, apan ang nuybe puntos nilang kadaogan usa ka pahimango alang sa Green Lancers nga mas dako pang hagit nga nag-atang kanila sa unahan ilabi na kay sunod nilang sangkaon mao man ang UAAP champion FEU Tamaraws.

Ang reigning MVP sa CESAFI nga si Mark Ababon wala kaayo mihimo og kasikas sa milabay nilang mga duwa, apan siya maoy nahimong bida ning higayona human miratsada og 18 puntos.

Timaan sa balanse nilang opensa, lain pang upat ka Green Lancers ang mitali og dili mominus sa 10 puntos. Si Jezar Esperat mitali og 12 puntos, si Gayford Santos ug si Rino Berami mikulit og 11 puntos matag usa, samtang si Ariel Mepaña midugang og 10 puntos.

Nakab-ot sa Green Lancers ang maong kadaogan bisan og ang usa sa mga labing mahait niining hinagiban nga si Jayford Rodriguez mi-amot lamang og kuwatro puntos ug si Eulogio Lasala, Jr. uno punto ray nahimo. Gumikan niini, usa ka mensahe ang buot ipa-abot sa Lancers sa ilang mga kaatbang ug kini way lain nga dili hitupngan ang teamwork sa ilang koponan. Testamento niini, nga lahi lahi ang topscorers ug basi sa mga iskor sa milabay nilang tulo ka duwa, wala sila mipakita og senyales nga duna silay star player gumikan kay tanan pulos man dunay ikatampo bisan asang departamento.