Spring Cooking Oil milampos

Nakuha na gyud sa Laguna Spring Cooking Oil ang kampiyonato sa katapusang 2006 National Basketball Championship Pre-Season tournament dihang ilang gisungag ang Pagadian Explorers sa iskor nga 72-71 sa finals didto sa Tagaytay International Convention Center.

Ang free throws maoy miluwas sa Spring Cooking Oil diin mao kini ang mipatay og maayo sa depensa sa Explorers.

Init kaayo ang gipakitang opensa sa duha ka koponan hinungdan nga sikit kaayo ang lahugay hangtud na sa katapusang kwarter.

Tungod sa paningkamot sa Explorers, ilang nabiyaan ang Spring Cooking Oil ni NBC president Nathaniel 'Tac' Padilla, 61-66 sa nahabiling 4:23 sa duwa.

Apan ang Cooking Oil Masters kalit lang nga misutoy og ilang nailog ang labaw, 70-69 sa nahabiling 2:17 uban na niini ang duha ka free throws ni Gilbert Neo.

Nangulo sa kalampusan sa Laguna mao si Rodel Manuel sa iyang 24 puntos samtang si Peter Naron mitali og 17 alang sa pilderong Explorers.

Sa laing bahin, ang Bacchus/Harbour Centre-Manila mipukan sa host team Batang Tagaytay, 90-77 aron pag-angkon sa ikatulong luna ning torneyo nga gipaluyuhan sa Molten, Natures Spring, Prime Channel, Spring Cooking Oil, and Sulpicio Lines.