Chicago, Phoenix miinat sa ilang baraha

Ang Chicago Bulls ug Phoenix Suns milampos gyud sa pagpukan sa ilang tagsa-tagsa ka kaatbang kagahapon sa National Basketball Association.

Ang Bulls nga nakakuha og ngilngig kaayong labok ni Ben Gordon kinsa mipabuto og 21 puntos, mipukan sa Philadelphia 76ers sa iskor nga 117-84.

"I think I'm putting together more consistent games," matud pang Gordon. "That's important for me right now. We need to continue to play like that."

Si Gordon kinsa mihipos og 8-for-13 sa field, nakakuha usab og maayong suporta gikan ni Kirk Hinrich nga midugang og 18 puntos ug si Malik Allen mikulit sa ilang season-high nga 16 puntos.

Ang Bulls sa maong kadaogan, miinat sa ilang baraha ngadto sa 23-29 win-loss rekord sa pagsulod sa All-Star break.

Ang Phoenix Suns miinat usab sa ilang baraha ngadto sa 35-17 win-loss human nila gilubong ang Houston Rockets sa iskor nga 109-75.

Ang Suns nakasakay sa maayong opensa nilang Steve Nash ug Shawn Marion.

Si Nash mitali og 21 puntos uban ang walo ka assists ug si Marion miabag og 16 gawas sa 12 ka rebounds.

Ang duha ka leading scorer nga sila si Tracy McGrady ug Yao Ming igo lang nagkumbuya og 16 puntos ug lima ka five rebounds hinungdan nga wala kaarti ang Rockets.