Red Bull misungag sa Kings, 3-1

Ang Red Bull Barako nagkinahanglan na lang og usa ka daog aron hingpit na gyud silang momartsa ngadto sa finals human nila gipalukapa ang 'crowd favorite' nga Ginebra Kings sa iskor nga 88-85 sa game 4 kagabii sa init na kaayong aksiyon sa San Mig Coffee PBA Fiesta Conference didto sa Araneta Coliseum.

"This win just boosted our confidence a lot more. The next step is just to stay focused and try to close it out Wednesday," matud pang coach Yeng Guiao.

Ang Barako nga kasamtangan na karong nag-una sa serye, 3-1, nakasakay sa init nga opensa sa ilang local main man nga si Enrico Villanueva kinsa mipabuto og 21 puntos gawas sa siyam ka rebounds.

Init usab kaayong opensa ang gipakita ni Larry Fonacier kinsa mipabuto usab sa iyang career-best nga 25 puntos.

Sa tinguha nga makatabla sa serye, ang Ginebra Kings init kaayong mipakanaog sa ilang naglagiting nga opensa hinungdan nga ilang naalkansi ang Red Bull, 77-85 sa nahabiling duha ka minuto.

Niini, nisamot kaalkansi ang Barako's dihang ang ilang import nga si James Penny gi-eject human kini makakuha og technical foul.

Apan inay nga maluya ang Barako, nanginit na hinuon kini sa pangulo ni Villanueva kinsa miwadwad og maayo.

Si Villanueva uban sa suporta sa iyang mga kaubanan, mangtas kaayo nga midutdot og miguba sa depensa sa Ginebra Kings hinungdan nga ilang napuhalan ang naulahi.

"I guess you're not going to find a grittier group than Red Bull today. The team just refused to go down," batbat pang Guiao.