Encorporado hari sa Post Sinulog Darts Singles

Gipamatuod ni champion darter William Encorporado nga siya ang hari sa dart human niya gidominar ang Post Sinulog Darts Singles Tournament diha sa Baseline Restaurant and Recreation Center.

Si Encorporado, kanhi pambato sa Cebu Darts Team nipukan ni Alvin Villa pinaagi sa pagpilde niini sa makaduha ka higayon sa last round.

Si Villa sa Terton Craft, maoy nangharos sa mga lokal nga torneyo, ug nimartsa sa finals bitbit ang twice-to-beat advantage tungod sa limpiyo niining baraha apan gibuling kini ni Encorporado sa final round, 2-0, 2-0.

Si Benedict "Dic-dic" Ramirez maoy nitapos sa ikatulong dapit, samtang si Steve Montenegro nahagba sa ikaupat.

Ang kampiyon nakadawat og P500 ug trophy, samtang ang ikaduha nakadagit og P300, ang ikatulo nibulsa og P200 ug ang ikaupat niuli bitbit ang P100.

Ang maong torneyo gisuportahan nilang Winnie Ocañada, Patrick Young, Allan Veloso, Raul de Guzman ug ni Dennis Tan ang presidenti sa Cebu Darts Association.