Lao, Gothong BTA Bowler of the Year

Mabulokon kaayo ang pagsugat sa kapaskuhon nilang Kimberly Lao ug Junjun Gothong dihang ilang nasakmit ang titulo isip Bowlingplex Tenpin Association (BTA) Bowler of the Year sa women ug men's divisions sa miaging adlaw didto sa Gaisano Bowlingplex.

Si Lao kinsa usa ka junior student sa Sacred Heart for Girls impresibong milangkat sa 2, 439 pinfalls sulod sa 12 ka duwa.

Si Lao nakadawat og P4,000.

Nahimutang sa ikaduhang dapit mao si Alexis Sy sa Philippine Christian Gospel School bitbit ang 2,372 pinfalls samtang si Rocci Damole sa St. Theresa's College maoy mipahiluna sa ikatulong dapit sa iyang 2, 372 pins, ug si Jennifer Tan nga adunay 2,207 pinfalls maoy mipatong sa ika-upat nga luna.

Si Sy mibulsa sa P3,000 ug si Damole adunay P2,000 samtang si Tan adunay P1,000.

Sa mens division, walay kurat nga mihipos og 2,840 pinfalls si Gothong aron pagtunol ni Clark Tiu sa ikaduhang dapit nga mihipos og 2,804 pins.