Shaq Mihimo dayo'g milagro

Balik na sa aksiyon ang higanteng si Shaquille O'Neal sa Miami Heat human sa lima ka semanang pagpa-alim sa iyang injury ug sa iyang pagbalik mihimo gilayon kini og dakong kontribusyon sa koponan.

Si O'Neal nga miduwa sa unang higayon sukad niadtong Nobiyembre 3, mipasulod sa iyang ikaduhang free throw aron pagduot sa lahugay ngadto sa overtime ngadto na sa pagkulit og daog batok sa Washington Wizards sa iskor nga 104-101 kagahapon sa nagpadayong aksiyon sa National Basketball Association.

"I felt pretty good," matud pang O'Neal nga mipupo og 10 puntos uban ang 11 ka rebounds. "I just wanted to get my guys going - bring some energy and spirit to the lineup."

Nakatabang kaayo og dako mao si Dwyane Wade kinsa mirehistro sa iyang season-high nga 41 puntos gawas sa 10 ka rebounds ug walo ka assists aron pagputol sa upat ka sunod-sunod nga kaparutan sa Heat.

Hayag unta nga makuha sa Wizards ang kalampusan dihang ilang gibiyaan ang Heat, 95-94 sa nahabiling 7 segundos sa katapusang kwarter.

Apan ang Heat maoy nakaposisyon sa bola. Si Wade daling mipasa sa bola ngadto ni O'Neal sa pagtuo nga makakuha kini og dakong milagro sa undergoal nga swerte usab nga nakakuha og foul ang naulahi.

Si O'Neal nga usa sa mga notorious sa kabanga sa free throw line, misipyat sa unang free throw apan sa ikaduha swerting mibulit ang bola sa ring nga miduot sa kulbahinam nga overtime.

"I knew I was going to make one," batbat pang O'Neal. "I wanted to make two, but the first one rattled in and rattled right out."

Nangulo sa pilderong Wizards mao si Caron Butler nga miposte sa iyang season-high nga 28 puntos nga gisundan usab ni Chucky Atkins sa iyang 26.

Sa laing duwa, ang Sacramento Kings naghari batok sa New Orleans Hornets, 110-100, ang Houston Rockets miugbok sa Portland Trailblazers, 100-86, ug ang Detroit Pistons mipukan sa LA Clippers sa iskor nga 109-101.

Ang Pistons sa maong kadaogan, mikulit sa ilang ika-unom nga sunod-sunod nga daog