2 bagitong swimmers nanorpresa

Dalawang bagitong swimmers ang gumitla sa dalawang Olympic Games campaigner, habang isang nagbabalik na tanker naman ang pumitas ng kanyang ika-apat na gintong medalya sa Day 4 ng Bank of Commerce-National Open Swimming Championships kahapon sa Rizal Memorial Swimming Pool.

Pinangunahan nina Denjylie Cordero at Bonus Bordado ang mga labanan sa women’s at men’s 200-meter breaststroke upang ibulsa ang gintong medalya sa naturang five-day meet na basehan ng Philippine Amateur Swimming Association (PASA) para sa pagbuo ng RP Team na ilalaban sa darating na 23rd Southeast Asian Games sa Nobyembre.

Nagposte ang 13-anyos na si Cordero ng 2:42.94 upang iwanan ang 21-anyos na 2000 Sydney Olympian na si Guerrero, tumipa ng 2:45.89 kasunod ang 2:54.19 ni Edzen Dinglasan.

Tinalo naman ng 17-anyos na si Bordado ang 2004 Athens Olympian na si Timmy Chua sa kanyang oras na 2:25.12 kumpara sa 2:26.03 ng huli kasunod ang 2:32.39 ni Francis Nico Villagante.

Naibulsa naman ng 23-anyos na si Liza Danila, naglaro sa 2000 Sydney Olympics, ang kanyang pang apat na gold medal nang pagreynahan ang women’s 200m freestyle sa bilis na 2:10.44 kasunod sina Marichi Gandionco (2:11.41) at Nikki Santiago (2:14.60).

Ang iba pang nagwagi ay sina Ronald Guiriba sa men’s 50m freestyle (24.41), Bordado sa men’s 200m breaststroke (2:25.12) at Ryan Arabejo sa men’s 1,500m Individual Medley (16:33.00). (Russell Cadayona)