NBC selection nakalubong na sab

Gihawanan og maayo sa Nature's Spring-backed National Basketball Conference selection ang ilang dalan paingon sa kampiyonato sa 9th Crown Prince Cup basketball tournament dihang ilang gilubong ang Singapore national team, 81-66, niadtong Domingo didto sa Jiranakorn Indoor Gymnasium sa Haad Tai City, Thailand.

Gumikan sa maong kadaugan, ang mga Pinoy nagsawo na karon sa liderato uban sa host Thailand, nga mikulit sab sa ikaduhang sunod-sunod nga kadaugan human gilampurnas ang South Korea, 90-82.

Nangu sa NBC selection mao si Marvin Tundag sa Mantawi Sparkling Nights nga mitali og 20 puntos, samtang sila si Mel Latoreno ug Marlon Kalaw sa Laguna Spring nagkumboya og 25 puntos.

Maayong labok ang gipakita sa mga Singaporeans sa sinugdanan, apan mikalit lang og katiurok ang ilang opensa human kini pabuthi og 33 puntos sa NBC selection sa ikatulong kuwarter.

"Our boys are playing inspired game for the flag and country. Our first two wins will be a good build up for our next games against South Korea and Thailand," matud pa ni NBC defending champion Tribu Sugbu coach Al Solis.

Unang gibiktima sa mga Pinoy'ng basketbolista mao ang Hong Kong pinaagi usab sa paglubong niini sa iskor nga 90-78, susamang team nga mipukan sa FedEx sa PBA dayon na ngadto sa pagdominar sa 13th Super Kung Sheung Cup dili pa dugay.

"We're looking great. The title is already near our sight but we're taking it one game at a time," matud pa ni coach Jun Noel sa Mantawi.

Sa kasamtangan, ang NBC selection nakigbugno pa sa South Korea. Kun modaog, hayan nga seguradong kampiyonato na ang ilang duwa ugmang adlawa batok sa Thailand.