Webmasters nakabalos na gyud sa Panthers

Ang University of Cebu (UC) Webmasters dali kaayong nakabangon gikan sa ilang kapildihan batok sa University of the Visayas (UV) Green Lancers dihang ilang gipahimungtan ang University of Southern Philippines (USP) Panthers, 106-95, sa 2005 Cebu Schools Athletics Foundation Inc. (CESAFI) basketball sa miaging adlaw diha sa USP gym.



Sa unang higayon, ang CESAFI mopahigayon og duwa didto sa Minglanilla gym diin ang four-time champion UV Green Lancers makigsangka sa University of San Jose-Recoletos (USJ-R) Jaguars.

Ang UC Junior Webmasters nakatilaw og sunod-sunod nga kaparotan, nga bag-o pa lang gilatigo sa USP Baby Panthers , 89-80.

Sa laing aksyon, ang University of San Carlos (USC) Lady Warriors nipukan sa Cebu Institute of Technology (CIT) Lady Wildcats, 84-76.

Nakapanimalos na gyud ang Webmasters ngadto sa Panthers. Kahinumduman, ang Webmasters wala gyud makadaog sa Panthers sa miaging season. Napilde kini sa elimination sa iskor nga 85-92, sa semifinals 68-85 ug sa ilang bugno alang sa ikatulong dapit , 92-94.

Apan sa miaging Martes ang Webmasters nipakita og dakung kausaban nga maoy nakapilde sa Panthers.