Ang alertong utok

Ang billiard usa ka dula nga matawag tang tigi sa taktika. Mao nga importante kaayo ang kondisyon sa hunahuna sa magdudula aron makapinsar siya'g maayong diskarte sa dula. Usa ka kongkretong pananglitan niini mao si Steve Davis, usa ka banggiitang bilyarista ug snocker player sa iyang panahon. Gituohan ni Davis nga ang maayong kondisyon sa hunahuna maghatag usab og kadasig sa tibuok niyang lawas. Alang kaniya, kun maayo ang kondisyon sa iyang hunahuna, abtik usab nga moresponde ang iyang lawas sa mga gimbuhaton. Mas lapad ang iyang pagpakabana ug kahiamgo kalabot sa mga butang nga posibleng mahitabo. Mabinantayon kaayo siya. Gawas nga offensive, defensive usab kaayo siya.

Kini ang gikinahanglan sa matag magdudula. Kinahanglan nga isilsil niya kanunay sa iyang alimpatakan nga angay gayod nga ang kait-on sa depensa ug opensiba gikinahanglan pag-ayo sa dulang bilyar. Pinaagi niini, makontrolar niya ang billiard table. Pinaagi niini makabentaha siya sa iyang kontra. Mao nga kinahanglan nga palihukon niya ang iyang utok sa paghunahuna kanunay sa angay niyang buhaton. Kinahanglan nga alerto kanunay ang utok.

* * *

Ang Pool and Billiard Magazine nag-ingon nga daku kaayo'g ikatabang sa malampusong pagdula ang aktibong partisipasyon sa utok. Una, misugyot ang maong basahon nga: "Try to be aware of potential distractions before they occur." Sa ato pa, kinahanglang pangandaman ug managana ang magdudula pagsagang sa bisan unsang posibleng mahitabo, partikular na ang mga panghitabo nga dili maoy atong gi-expect nga mahitabo sa dula.

Ang usa ka magdudula nga nagpakabana sa iyang billiard career adunay lapad nga panagana alang sa bisan unsang mahitabo. Dili siya gustong masurprisa sa mga panghitabo nga wala niya paabota. Nagpabarog siya kanunay og depensa bisan dili siya ang nagturno sa pagtira sa ibabaw sa lamesa.

Labaw sa tanan, miingon ang Pool and Billiard Magazine: "Alert your brain." Mao gayod kini ang lintunganay. Dili gayod makuwestiyon nga ang alertong utok gikinahanglan kaayo sa pagdula og bilyar.

Kun dili alerto ang utok, dili usab makaamgo ang magdudula sa potensiyal niyang kapildihan. Busa, gikinahanglan ang alerto nga utok.

* * *

(For comments and suggestions text at 0910-8105522 o mag-email sa [email protected])