FIVB seminar ipahigayon karong Agosto 19

Ang mga representante gikan sa partisipanteng mga lungsod ang magpundok alang sa usa ka adlaw nga International Volleyball Federation (FIVB) seminar karong Agosto 19 sa alas 9:00 sa buntag diha sa Provincial Capitol Social hall.

Ang Cebu Volleyball Association (CEVA) maoy modumala sa seminar nga mopahibawo sa bag-ong rules and regulations sa volleyball kabahin sa pagpangandam sa inter-municipality tournament nga pagatambongan sa 54 ka munisipalidad ug lima ka siyudad dinhi sa lalawigan sa Sugbu.

Ang Guv Cup nga gitakda karong Oktubre migahin og P100,000 alang sa provincial champion ug P50,000 sa runner-up, samtang ang inter-cluster champion makabulsa og P20,000 ug P10,000 alang sa runner up.

Ang seminar mosunod human sa press conference uban ni Governor Gwen F. Garcia diha sa governor's office sa alas 12:00 sa udto.