Randy Suico nangandam na sa dakung hagit

Nangandam na si Oriental and Pacific Boxing Federation super featherweight champion Randy 'Kumong Bato' Suico sa laing daku ug kulbahinam nga away batok ni kanhi International Boxing Federation lightweight champion Javier Jauregui sa Mexico karong Septiyembre 17 didto sa MGM Grand Hotel sa Las Vegas, Nevada.

Ang away nilang Suico ug Jauregui magasilbeng usa sa mga undercards sa pagdepensa sa Meksikanong si Marco Antonio Barrera sa iyang World Boxing Council ug IBF super featherweight titles batok ni Robbie Peden sa Australia.

Napanglantawan sa Sugbuanong trainer nga si Jun Ablaca nga usa ka lig-on nga kaatbang si Jauregui ug usa sab kini ka dakung babag sa dalan ni Suico aron mamahimong world champion.

"Kining maong away usa gyud ka big test alang ni Suico kun duna ba gyud siya'y ikabuga aron mamahimong world champion. Kinahanglan niyang ipakita ang tanan niyang abilidad alang ning away," matud pang Ablaca sa dihang nahinabi sa Banat News.

Kung modaog ang 25-anyos nga si Suico batok ni Jauregui, ang sunod nga target ni Ablaca mao ang pagpaharong sa iyang batos batok ni Barrera.

"Mao ni ang gipasalig sa among Hapon nga manager nga si Jo Koizumi nga kun modaog si Suico sa umaabot niyang away, iyang paningkamotan nga maka-challenge si Suico ni Barrera," matud pa ni Ablaca.

"Apan kun dili gyud makaaway si Suico ni Barrera, si Koizumi nagplano nga pasakaon sa lightweight division si Suico," dugang pang Ablaca.

Si Suico, nga mao karon ang No. 4 super featherweight contender sa WBC sunod nilang Erik Morales, Jesus Chavez ug Manny Pacquiao, nagbitbit og 23-1 win-loss record, uban ang 20KOs, samtang si Jauregui nagtangag og 49-12-1 win-loss-draw record uban ang 32KOs.

Si Jauregui nahimong IBF lightweight champion human gipakamang ang Amerikanong si Leavander Johnson sa ika-11 nga hugna niadtong Nobiyembre 22, 2003 didto sa Olympic Auditorium sa LA.

Apan unom lamang ka bulan ang paghari ni Jauregui gumikan kay gipakanaog man siya sa iyang trono ni Julio Diaz pinaagi sa majority decision didto sa Sports Arena sa San Diego, California.

Sa laing bahin, agi'g timaan sa way pagkapalong niyang determinasyon aron himuon nga usa ka world champion si Suico, si Koizumi mipapirma og dugang lima ka tuig nga kontrata ni Suico. Kini nagpasabot nga si Suico magpabilin sa poder ni Koizumi hangtud sa tuig 2010.