Ang pinakahuli ay mula sa 21-point deficit bago nahatak ang 79-77 tagumpay laban sa San Miguel na nagtabla ng kanilang best-of-five semifinal series sa 1-1 panalo-talo sa Gran Matador PBA Fiesta Conference.
Bagamat respetado ang Barakos bilang ‘come-back’ team, kung maaari ay ayaw ni coach Yeng Guiao na mapasuot silang muli sa sitwasyong ito.
Muling haharapin ng Barakos ang mapanganib na San Miguel para sa Game-Three ng semis series na magpapatuloy sa Cuneta Astrodome sa alas-7:35 ng gabi gayundin ang Talk N Text at Shell sa unang laro, alas-4:45 ng hapon.
Tulad ng Barakos, nakabawi rin ang Turbo Chargers sa kanilang sari-ling semis series laban sa Phone Pals sa pamamagitan ng 94-92 panalo.
Ang dalawang araw na pahinga at preparasyon ay sinamantala ng Red Bull at Shell para makabawi sa pagkatalo sa Game-One laban sa SMBeer, 81-89 at Talk N Text, 74-97 ayon sa pagkakasunod dala ng kanilang kapaguran mula sa dinaanang wild card phase at quarterfinal round.
Dahil parehong tabla na ang dalawang semis series, parang best-of-three na lamang ito kaya ang dalawang mananalong koponan ngayon ay siyang makakalapit sa finals na gagamitan ng best-of-seven series. (Ulat ni CVOchoa)