Si Pabs H.

Nagtuo kong dili daghang mga Sugboanon ang nakaila sa gitawag nako nga si Pabs H. Siya si Pablo Hernandez III, usa ka hard-hitting columnist sa usa ka national daily tabloid. Daghan ang nakaila kaniya didto sa kaulohan ug naila siya gumikan sa hait ug walay kukahadlok niyang mga komentaryo ug pagbulgar sa mga anomaliya sa mga tawong naghimog kahiwian. Karong panahona migrabe ang pagpamatay sa mga mediamen. Gani may usa na man ka photo journalist ning Banat News nga nakuha sa mga salbahis, si Allan Dizon. Di Pabs H. usa sa gitinguhang itumba sa mga tawo nga nasilag sa taga media. Pero wala pa gayod tingali moabot ang demalas ni Pabs kay nakaikyas man siya sa tinong kamatayon.

Duha na ka higayon nga gisulayan sa pagpatay si Pabs apan kanunay napakyas ang mga tawo nga nagtinguha sa iyang kinabuhi. Ang unang attempt sa pagkutlo sa iyangkinabuhi nahitabo samtang nagdula siyag bilyar sa usa sa mga bilyaran sa Quezon Avenue, Quezon City nga duol ra sa buhatan sa tabloid nga iyang gisulatan. Napakyas ang mamumuno sa pagpatay kaniya. Apan giusban siya karong bag-o samtang siya padulong na untang mopauli sa iyang gipuy-an. Maayo gani kay nakabantay siya ug nakabalos pa pagpusil.

* * *

Si Pabs mahiligon kaayo sa pagdula og bilyar. Kanunay siyang modula sa Side Pocket Billiards ug sa Bigshot Bar and Billiard nga pulos nahimutang sa Quezon Avenue, Quezon City. Kining duha ka bilyaran maoy sagad nga abotanan sa mga sakop sa media nga mahiligon sa billiard sport. Didto nako unang nakita si Pabs H. dihang usa ka higayon mikuyog ko sa higala kong reporter ngadto sa maong mga bilyaran. Mahigalaon si Pabs. Apan dili usab maikog moatake sa iyang column kon may makita siyang kahiwian. Mao tingali nga gikainitan siya sa mga badlongon sa katilingban.

Mas nakadayeg ko sa iyang kahanas nga modulag bilyar. Gani, kon may billiard tournament nga ipahigayon sa kahugpongan sa prensa didto sa kaulohan, dili man gayod siya mapiri. Nagtuo ko nga kon may mga sakop sa media nga maungo sa maong dula, mosamot paglambo kining maong matang sa sports. Kana bang dili lang kay kutob ra kita sa pagsulat mahitungod sa mga panghitabo sa billiard sport kondili aduna gayod kitay aktuwal nga partisipasyon sa maong dula. Sama ni Pabs.

* * *

(Text at 0910-8105522. E-mail: [email protected])

Talisay City Swimming Team midawat og pasidungog gikan sa kagamhanan sa dakbayan sa Talisay. Sa wala mao si Mayor Socrates Fernandez, tuo si Jo Florence Bas, SK Federation president, ug sa likod sa mga swimmers si konsehal Rodolfo Cabigas.