Tambalang Dandan-Barte lusot

Makaraang mabigo sa singles event, bumalikwas sina Ralph Barte at Kyle Joshua Dandan nang magtambal ito tungo sa pagkuha ng unang slot ng ikalawang round ng boys doubles event sa 16th Mitsubishi Lancer International Tennis Federation Tournament sa Rizal Memorial Tennis Center.

Pinayuko ng tambalang Dandan-Barte ang mag-kaparehang sina Halvar Dil ng Netherlands at Adrian Basco ng Pilipinas, 6-2, 6-0 at itakda ang pakikipag-tagpo kina No. 3 Martin Sayer at Xiao Peng Lai ng Hong Kong.

Umusad din sina Miguel Narvaez at Pablo Olivarez II sa susunod na round makaraang igupo sina Marcel Goodman ng US at Gregory Gumbs ng France sa loob ng 45 minutong palitan ng bola.

Makakaharap nina Narvaez at Olivarez sina seventh seed Myles Blake ng Great Britain at Samul Groth ng Australia na naka-bye sa draw sa torneong itinataguyod ng Philippine Tennis Association at supor-tado ng Philippine Sports Commission.

Sa girls’ doubles, walang sinuwerte sa mga Pinay netters nang kapwa yumukod ang mga ito sa kani-kanilang laban.

Sinorpresa nina Ayumi Yoshida at Erina Kikuchi ng Japan ang magkapatid na Nikki at Conchita Zoleta 6-1, 6-4 habang napatalsik naman sina Trudy Gine Amoranto at Ivy Kristel de Castro. (Ulat ni CVOchoa)