RP flag opisyal na iwinagayway sa Athens

ATHENS--Opisyal ng tinanggap ang Philippines sa Olympic Village noong Martes ng gabi ni Village Mayor John Marros sa isang maikli at simpleng flag-raising ceremony sa amphitheater sa tabi ng International Zone dito.

Pinangunahan ni Chef de Mission Steve Hontiveros ang 27 iba pang miyembro ng ‘lean and mean’ RP delegation na dumalo sa 20 minutong event kung saan inawit ang Pambansang Awit ng Pilipinas kasabay ng dahan-dahang pagtaas ng bandila ng bansa sa kalangitan.

Tampok sa maikling seremonya ang cultural presentation na limang minutong modern dance na siyang naglalarawan sa Olympic motto na ‘Faster, Higher, Stronger’ na kinakitaan din ng pagtataas ng bandila ng tatlong iba pang bansa--Egypt, Iceland at Bhutan.

Nakasuot ang mga Filipinos ng puting Barong Tagalog at brown na pantalon para sa nasabing okasyon.