Tangan ang matikas na 9-1 rekord, nakatakdang makipagharap ang Beermen sa Shell Velocity sa tampok na laro sa ganap na alas-7:10 ng gabi.
Bago ito, target naman ng Sta. Lucia Realty na maikonekta ang kanilang ikatlong sunod na panalo at makabalik sa kontensiyon sa kanilang pakikipagtipan sa Purefoods TJ Hotdogs sa ganap na alas 4:45 ng hapon.
Tiyak na may pantapat na ngayon ang Shell kay Art Long nang magpaki-tang gilas ang kanilang bagong import na si Jameel Watkins sa kanyang debut game noong Miyerkules kontra sa Talk N Text.
Si Watkins ay kumana ng 29 puntos, 23 rebounds, 7 blocks at 5 assists para igiya ang Turbo Chargers sa 91-89 panalo sa Phone Pals. Ito ang kanilang ikatlong panalo sa huling 4 na laro at ika-2 sa tatlong unang laro ng bagong coach na si Leo Austria.
Samantala, magbabalik aksiyon na si Kenneth Duremdes sa pag-haharap ng Realtors at Hotdogs. Bukod kay Duremdes magbabalik aksiyon din si Chris Tan. Inilagay naman ng Realtors si Paeng Santos sa injured list habang pinakawalan na nila si Noli Locsin na ang kontrata ay mapapaso pa sa katapusan ng taong ito. (Ulat ni DMVillena)