Kampanya sa Athens Olympics ipagpapatuloy ng Pinoy boxers

Pangungunahan ni 2003 Southeast Asian Games lightflyweight gold medalist Harry Tanamor, ang kampanya ng apat na boxers ng bansa na makakuha pa ng tiket patungo sa Athens Olympics sa kanilang paglahok sa China International Open, ang ikalawang qualifying tournament para sa Asia sa Guanzhou, China.

Ang RP team na gigiyahan nina coach George Caliwan at Boy Velasco, ay kabibilangan din nina bantamweight Ferdie Gamo, featherweight Roel Laguna at lightweight Genebert Basadre.

Ang torneo ay nakatakda sa Marso 18 hanggang 26 na may 20 qua-lifiers sa gold at silver medalists sa 9 na weight divisions.

Ayon kay ABAP president Manny Lopez, na siya ring secretary-general ng Federation of Asian Amateur Boxing (FAAB), aasintahin ng asosasyon ang tatlo pang karagdagang tiket sa nauna nang nakamit nina flyweight Violito Payla, light welterweight Romeo Brin at middleweight Chris Camat na kanilang nakuha sa Asian Boxing Championships sa Palawan noong Enero.