Swimming gold nais mabawi nina Buhain at Camacho

HO CHI MINH -- Magkatulong sina Philippine Sports Commission Eric Buhain at Chef de Mission Julian Camacho sa paghiling kay 22nd Southeast Asian Games Federation president Nguyen Danh Thai para makuha uli ang kontrobersiyal na swimming gold na nakawala sa mga Pinoy tankers noong Deisyembre 6.

Isang sorpresa ngunit magandang aksiyon ito mula sa PSC at Philippines Olympic Committee body na hindi halos nag-uusap dahil sa mga problema sa pagre-release ng pondo at magkaibang sports functions.

Ipinagkait sa RP swimming team sa 4x200m relay finals ang gold dahil ayon kay FINA Technical representative Woon Sui Kut, isang paglabag sa kompetisyon ang early start na isinagawa ni second swimmer Miguel Molina.

Ngunit napag-alaman na wala nang paglabag na nagawa si Molina at pruweba dito ang computer printout ng team’s performance na kanilang inilakip sa sulat.

"Mr. Woon informed our team that the alleged violation occurred during the 200-meter exchange, but further analysis on the printout revealed that the negative .89-second violation happened on the 300-meter mark," ayon sa sulat ni Buhain kay Nguyen.

Nakasaad naman sa sulat ni Camacho na, "We did not file a protest because we were not given the correct information."

"We have a very strong case. Even our opponents said we really won the gold," ani Buhain na kinonsulta din ang electronic device engineer na namamahala sa pagmomonitor ng equipment na si Urs Siegenthaler mula sa Germany, na nagsabing nagulat ito nang makitang negative .89 reading sa 300m mark na nangangahulugang walang naganap na early start. "He said it’s ridiculous, and promised to check the computer for computer flaws," sabi pa ni Buhain.

At kapag napagbigyan ang PSC at POC sa kanilang hiling malamang na ito ang maging ikatlong gold ng swimming sa dalawa nina Miguel Mendoza at Miguel Molina.(Ulat ni DMVillena)