Blu Boys bigo pero may pag-asa pa sa titulo

Buong giting silang nakipaglaban subalit kinapos pa rin ang RP Blu Boys sa bandang huli at hinayaan ang Japan na maipuslit ang 9-2 panalo, na naggawad dito ng unang upuan sa kampeonato ng 7th Asian Men’s Softball Championships kahapon sa Rizal Memorial Stadium.

Seryoso sa kanilang misyong makopo ang koronang huli nilang nahawakan noong 1990, ang Blu Boys ay ngipin-sa-ngiping nakipagsabayan sa mga Japanese sa unang 5 inning subalit nabigo silang sustenahan ito sa kasunod na frame, na nagbigay ng pagkakataon sa bisita para iposte ang abbreviated win na ito.

"Bumigay kasi yung pitcher natin (si Florante Acuña). Pero ang maganda dito, nakita na natin yung number one pitcher ng Japan (si Nishimura), so alam na natin kung ano yung istilo pagnakaharap uli natin sila bukas (ngayon)," ani Blu Boys coach Reynaldo "Baby" Manzanares.

Si Mark Rae Ramirez, ang tanging kaliweteng pitcher ng host team, ay inaasahang gagamitin sa kampeonato sa ika-3:00 ng hapon ngayon.

Subalit upang makarating dito, ang Blu Boys ay kailangan munang magwagi kontra sa Chinese Taipei sa alas-11:00 ng umaga.

Sa iba pang laro, nilampaso ng Indonesia ang Iran, 10-0, habang blinangko ng Thailand ang India, 3-0. (Ulat ni IAN BRION)