Mangubat nagbanta kay Gabi

Nagbigay ng matinding babala ang nagdedepensang World Boxing Council International flyweight champion Randy Mangubat sa humahamon na si Diosdado Gabi, at sinabing mahihirapan maghanap ng daan ang huli para maging kampeon sa kanilang paglalaban sa 12 round war ng "Engcuentro" sa Nobyembre 9 sa North Cotabato Provincial Gymnasium sa Kidapawan City.

Ang event na pinakamalaking pa-boksing na gaganapin sa Mindanao ay suportado ng San Miguel Corporation.

Ito ang naging reaksiyon ni Mangubat (31-18-11, 18 KOs) sa pahayag ni Gabi na handa na itong alisan ng korona ang tubong Sto. Tomas Davao del Norte na boksingero.

"He does not have my war experience. And he has not faced the kind of opposition I had. Let him step up and do the talking, I’ll see if he can match my power," banta ni Mangubat.

Si Gabi na may palayaw na "The Prince" ay magsasagawa ng kanyang unang pagtatangka para sa WBC international title.

Bilang karagdagang atraksiyon, haharapin naman ni RP junior lightweight king Bobby Pacquiao si Fil-Am Arnic Aravala sa 10-rounder duel.