Dolphins yuko sa Stags

Kumawala ang defending champion San Sebastian College sa ikatlong quarter at hindi nila hinayaang magtagumpay ang paghahabol ng Philippine Christian University sa final canto upang iposte ang 82-75 panalo sa NCAA men’s basketball tournament sa Rizal Memorial Coliseum kahapon.

Nakawala ang SSC Stags sa three-way log-jam matapos ilista ang kanilang ika-pitong panalo sa 11-laro at maaaring makisalo sa liderato kung mananalo ang Mapua Institute of Technology laban sa Colegio de San Juan na kasalukuyang naglalaban habang sin-sulat ang balitang ito.

Kumawala sa dikdikang laban ang San Sebastian nang kanilang kunin ang 12-puntos na kalamangan bago matapos ang ikatlong quarter, 59-47 at 61-49.

Sa unang laro, nanaig din ang SSC Staglets kontra sa PCU Baby Dolphins, 76-72 sa juniors game para sa double celebration ng Baste.