Montana, Hapee nalo

Kung kailangan ng John-O na manalo para manatiling buhay, nagpa-kita naman ng mas malaking determinasyon ang Montana Pawnshop nang iposte nila ang 72-59 panalo at makasiguro ng playoff para sa huling championships berth ng Sunkist-PBL 2003 Unity Cup sa Pasay Sports Complex.

Nagtala si Jon Dan Salvador ang 15 puntos, 6 rebounds at 3 blocks para ilista ng Jewelers ang kanilang ikatlong semifinal win sa apat na asignatura.

Sa kabilang dako, ang John-O na isa sa malakas na contender sa title ay lumasap ng kanilang ikaapat na sunod na kabiguan na ang tanging pag-asa ay puwesto para sa labanan sa third place.

Sa ikalawang laro, nagpakawala naman ng 11-0 blast ang Hapee Toothpaste sa final six minutes nang baligtarin nito ang laban at kunin ang 74-65 panalo kontra sa Viva Mineral Water at makisosyo sa liderato.

Namuno si Allan Salangsang sa kanyang ipinosteng 16 puntos, 9 rebounds at isang steal nang samahan niya si Niño Gelig sa krusiyal na atake at makasama ang Montana sa unahan sa 3-1 record.

Nalaglag naman ang Water Force sa 2-2 marka.

Isang triple ni Warren Ybañez ang bumasag sa pananahimik ng Viva habang kumana din ng basket si Jason Misolas para ilapit ang iskor sa 65-69 may 44 segundo na lamang ang nalalabing oras.

Ngunit hanggang doon lang ang nagawa ng Viva.