Panalo ng Phil.Star nagbigay ng tiket sa CAR Inc. sa semis

Inangkin ng host Phil. Star ang No. 1 place sa Final Four ng Coke Light Invitational basketball tournament sa Meralco gym.

Pinatalsik ng Starmen ang defending champion RCBC Savings Bank makaraang gapiin ito sa iskor na 104-87 na naging daan naman para okupahan ng CAR Inc. ang No. 4 place sa panalong ito.

Nauna rito, pumuwesto naman ang Red Bull sa ikatlong posisyon makaraang durugin ang Sunkist, 90-55 at No. 2 naman ang PLDT na nanaig sa CAR Makers. 75-72.

Bagamat nagbigay pa ng matinding hamon ang Bankers hindi nito nasustinahan ang mahusay na opensa ng Phil. Star na pinagtulungan nina Chris dela Cruz, Jonjon De Guzman at Ver Roque na nagtala ng double-digit para sa Starmen.

Nagtala ng 23, 22 at 21 puntos sina Dela Cruz, De Guzman at Roque, ayon sa pagkakasunod.